Qırımda Rusiye uquq qoruyıcıları siyasiy mabüslerniñ imayesini yapqan qırımlı advokatlar Edem Semedlâyev, Emil Kurbedinov, uquqçılar Nazim Şeyhmambetov, Elvina Semelâyeva, Rustem Kâmilev ve Lilâ Gemeciniñ ofisinde "operativ tedbirler" keçire. Bu aqta "Qırım birdemligi" cemaat birleşmesi haber ete.
"Uquq qoruyıcılarnıñ operativ areketlerini Ekstremizm ile küreş merkeziniñ bölük yolbaşçısı Ruslan Şambazov idare ete. Al-azırda anda Edem Semedlâyev, Nazim Şeyhmambetov, Lilâ Gemeci ve Rustem Kâmilev buluna. Advokat Emil Kurbedinovnı ofiske kirsetmeyler", – dep aytıla haberde.
Al-azırda resmiy bir izaat yoq.
Yañı malümat: Qırımlı aq qorçalayıcılarnıñ ofisini teşkermek qararı Qırımdaki Rusiye Federatsiyası İç işler nazirliginiñ polis yolbaşçısınıñ muavini Dmitriy Nesterovnıñ mahkeme muracaatından soñ çıqarıldı.
Rusiye kontrolindeki Qırım Yuqarı mahkemesiniñ reis muavini Viktor Sklârov polis hadimlerine advokatlarnıñ ofisini teşkermege izin berdi, çünki "Qırım Cumhuriyetindeki İç işler nazirliginiñ Qırım merkeziy advokatlar kollegiyasınıñ azalarınıñ Rusiye Federatsiyası Ceza kodeksiniñ 205.5, 205.1, 199 maddelerine köre qanunsız areketlerge alâqaları bar olğanını tüşünmek içün yeterli sebepleri bar". Bu maddeler terror teşkilâtınıñ faaliyetini teşkil etüv, terror faaliyetine qoltutuv ve bergi tölemekten vazgeçüvnen bağlı.
Uquq qoruyıcılar "uquqqa qarşı areketlerni" advokatlar Emil Kurbedinova, Edem Semedlâyev ve digerleri yapqan, dep şübhelene.
"Berilgen malümatqa köre, bu şahıslar iş ve diger faaliyeti içün kiralar tuta. <…> Anda olarnıñ uquqqa qarşı faaliyetini isbatlaycaq malümatnı taşığan kâğıt ve cihazlar, vatandaşlardan alınğan eşya ve şeyler ola bile. <…> Qırım Cumhuriyetindeki İç işler nazirligi berilgen muracaatnıñ sebeplerine dair yeterli qadar delil kösterildi", — dep aytıla mahkeme qararında.
Teşkerüv vaqtında uquq qoruyıcılar Emil Kurbedinov ve Edem Semedlâyevniñ advokat añlaşmalarını, Kurbedinovnıñ orderi ve advokat müürini aldı.
Uquq qoruyıcılar qırımtatar advokatları ve uquqçılarına ilk sefer basqı yapmay: birinci kere 2016 senesi "E" Merkeziniñ hadimleri advokat ofisine kirmege tırıştı. Bir yıldan soñ olar kene imayecilerge keldi, Emil Kurbedinovnıñ dairesi de baqılğan edi. Onı tutıp, "VKontakte" içtimaiy ağında paylaşqanları içün natsist timsallerini açıq numayış etkeninde qabaatlap, 10 künge apiske alğan ediler.
2018 senesi uquq qoruyıcılar uquqçı ve advokatlar bulunğan "Qırım birdemligi" aq qorçalayıcı birleşmesiniñ körüşüvlerine kelgen edi. Lilâ Gemeci, Edem Semedlâyev ve bir qaç künden Emil Kurbedinov "E" Merkezi ve Qırım prokuraturasınıñ hadimleri tarafından tenbiler aldı, imayecilerge razılıq alınmağan "Rusiye Federatsiyasınıñ akimiyetine qarşı ekstremist aktsiyalarınıñ" teşkilâtçıları dep aytıldı.
2022 senesi avgust ayında Çeçenistannıñ advokat palatası advokatlar Lilâ Gemeci, Rustem Kâmilev ve Nazim Şeyhmambetovnı zenaat statusından marum etti.
