Rusiye Federatsiyasınıñ uquq qoruyıcıları Rusiye apishanelerinde siyasiy sebeplerden taqip etilgen 325 qırımlı tutula. Bu malümatnı dekabrniñ 10-nda Qırımtatar resurs merkezi (QRM) bere.
QRM malümatına köre, tutulğan qırımlılar arasında:
- em bedeniy, em maneviy basqığa oğrağan 42 qadın;
- tibbiy yardım alamağan, saqatlığı olğan 8 insan;
- qorantasından ayırılğan 63 çoq balalı ana-baba;
- 64 genç;
- ilâç ve yardımsız qaldırılğan 28 esli-başlı insan.
"İşğal etilgen Qırımda Rusiye akimiyeti büyük ve sistematik repressiyalarnı devam ettire, yaşına-alına baqmay – qadın, genç, esli-başlı insanlar ve atta saqatlığı olğan insanlar zarar köre. Yüzlernen Ukrayina vatandaşı uydurılğan qabaatlar boyunca koloniya ve tahqiqat izolâtorlarında tutula, basqı ve işkencege oğratıla", – dep aytıla QRM haberinde.
Sentâbrniñ soñunda Qırımtatar resurs merkezi Qırım işğali başlağanınen Rusiye akimiyeti tarafından siyasiy sebeplerden taqip etilgen qırımlılarnıñ sayısı arttı, dep bildirdi. Al-azırda, Qırımtatar resurs merkeziniñ malümatına köre, olarnıñ sayısı 447 insan oldı, 258-i – qırımtatarı.
QRM taqip etilgenlerni statusğa köre böyle ayıra:
- mahküm etilip koloniyada tutulğanlar – 213 (120-si – qırımtatarlar);
- sıñırlanğan ya da tüzetüv müddeti olğanlar – 57 (30-ı – qırımtatarı);
- SİZOda olğanlar – 78 (44-ü – qırımtatarı);
- azat etilgenler – 63 (36-sı – qırımtatarı);
- taqip etilgenler – 36 (28-i – qırımtatarı).
Aynı vaqıtta, Ukrayina prezidentiniñ Qırım Muhtar Cumhuriyetindeki temsilciligi, 2025 senesi dekabrniñ 8-ne qadar Rusiye işğal etken Qırımda siyasiy sebeplerden eñ az 224 insan apiste tutula, dep bildirgen edi. 133-ü – qırımtatarı.
