Rusiye arbiyleri dekabrniñ 11-ne keçer gecesi Ukrayinanıñ kritik infrastruktura obyektlerine büyük darbe endirip, üç İskander-M/KN-23 ballistik raketası ve 151 darbe uçujısızını qullandı. Olarnı Rusiyeniñ dört yönelişinden, işğal etilgen Qırımnıñ Çavda burnundan ve Sarabuz qasabasından uçurdılar, dep bildirdi Ukrayina Silâlı quvetleriniñ Ava küçleri.
Arbiylerniñ malümatına köre, darbeniñ esas yönelişi Poltava vilâyetiniñ Kremençug şeeri oldı. Odesa vilâyeti ve cebege yaqın yerler de ücümge oğradı.
"İlk malümatqa köre, saat 10:00-ğa qadar, ava mudafaası 85 ava nişanını urdı/bastırdı: 83 duşman Shahed uçujısızı, Gerber (diger uçucısızlar); eki İskander-M/KN-23 ballistik raketası", – dep aytıla haberde.
Ava küçleriniñ malümatına köre, 34 yerde 69 darbe uçucısızı ve bir İskander-M/KN-23 ballistik raketasınıñ ücümleri qayd etildi.
Rusiye arbiyleri şimdilik bir şey izaatlamadı.
Rusiye arbiyleri çeşit silâ qullanıp, muntazam sürette Ukrayina regionlarına ücüm ete.
Rusiye akimiyeti, Rusiye ordusı Ukrayinanıñ şeer ve köyleriniñ grajdan infrastruktursına maqsatlı darbelerini endirgenini red ete, sakinlerni öldürgenini ve hastahaneler, mektepler, bala bağçaları, energetika ve suv teminlevi obyektlerini yoq etkenini ayta.
Ukrayina akimiyeti ve halqara teşkilâtlar bu darbelerni Rusiye Federatsiyasınıñ arbiy cinayetleri olaraq tanıdı ve olarnıñ maqsatlı olğanını qayd ete.
